រស់ក្នុងបច្ចុប្បន្នកាល! តើរស់ដូចម្តេច?
ពេលមេឃភ្លៀង ចូរកុំសុំឲ្យមេឃបើកថ្ងៃ ពេលមេឃបើកថ្ងៃ ចូរកុំសុំឲ្យមេឃភ្លៀង។ ពេលមេឃភ្លៀង ចូររីករាយជាមួយនឹងតំណក់ទឹកភ្លៀងចុះ។ ពេលមេឃបើកថ្ងៃ ចូររីករាយជាមួយនឹងពន្លឺព្រះអាទិត្យចុះ។
ធ្វើប៉ុណ្ណឹងបាន គឺមានន័យថា អ្នកចេះរស់នៅក្នុងបច្ចុប្បន្នកាលបានល្អហើយ។
ធ្វើបានទេប៉ុណ្ណឹង?
ពីខ្ញុំ សុីនិន
នៅក្នុងរឿងភាគបុរាណចិនមួយ មានមេបក្សពិភពគុនដ៏ស្រស់សង្ហាម្នាក់មានក្បាច់គុនខ្លាំងដាច់គេនៅលើលោក។ គ្មាននរណាអាចវាយឈ្នះគាត់បានទេ។
តែមានរឿងចម្លែកមួយ គឺមាននារីដ៏ស្រស់ស្អាតបរិសុទ្ធម្នាក់។ ឲ្យតែពេលណាមេបក្សរូបសង្ហានេះនៅក្បែរនារីម្នាក់នេះ មេបក្សរូបសង្ហាម្នាក់នេះមិនអាចបញ្ចេញយុទ្ធសីលនៃក្បាច់គុនរបស់គាត់បានឡើយ។
ពួកបក្សបីសាចទាំងឡាយបានហៅនារីដ៏ស្រស់ស្អាតបរិសុទ្ធម្នាក់នេះថា “នាងគឺជាគ្រោះស្លាប់រស់របស់មេបក្សពិភពគុនម្នាក់នេះហើយ”។
បានដឹងដូច្នេះ ពួកបីសាចក៏នាំគ្នារកគ្រប់វិធីដើម្បីបញ្ជូននារីម្នាក់នេះឲ្យទៅនៅជិតមេបក្សមួយនេះ។
មនុស្សយើងម្នាក់ៗក៏ប្រហែលជាដូចទៅនឹងមេបក្សម្នាក់នេះដែរ គឺតែងតែមានគ្រោះស្លាប់រស់មួយដែលជារបស់ខ្លួន។ វាអាចជាសកម្មភាពណាមួយ របស់អ្វីមួយ ហេតុការណ៍អ្វីមួយ ឬមនុស្សណាម្នាក់។ ឲ្យតែអ្នកបាននៅក្បែររបស់ទាំងនេះ អ្នកស្រាប់តែប្រែក្លាយខ្លួនទៅជាធ្វើខុស ឬអស់ថាមពលពីក្នុងខ្លួនភ្លាមមួយរំពេច។ តើអ្នកធ្លាប់បែបនេះដែរទេ?
ដូច្នេះ តើអ្វីទៅជាគ្រោះស្លាប់រស់របស់អ្នកនាពេលកន្លងមក?
មិត្តអ្នកអានដឹងទេ បើអ្នកបានស្គាល់គ្រោះស្លាប់រស់របស់ខ្លួនឯងច្បាស់ នោះគ្រោះនឹងប្រែក្រឡាស់ជាលាភសំណាងវិញជាពុំខាន។
ពីខ្ញុំ សុីនិន
តើអ្នកធ្លាប់បានអានឃ្លាមួយនេះដែរទេនាពេលកន្លងមក?
“គ្មានគោលដៅ ទីណាក៏ទៅមិនដល់”។
ដូច្នេះ ប្រសិនបើអ្នកមិនទាន់រកឃើញគោលដៅអ្វីវែងឆ្ងាយសម្រាប់ជីវិតរបស់អ្នកនៅឡើយទេ យ៉ាងហោចណាស់ អ្នកក៏គួរតែដឹងថា នៅព្រឹកថ្ងៃស្អែក អ្នកនឹងត្រូវទៅធ្វើអ្វី ដើម្បីអ្វីដែរ។ តើមែនទេ?
បើពុំដូច្នោះទេ ជីវិតរបស់អ្នកមួយនេះ ទីណាក៏ទៅមិនដល់ពិតមែនហើយ។
ធ្វើអ្វី? ដើម្បីអ្វី? ធ្វើអ្វី? ដើម្បីអ្វី? ធ្វើអ្វី? ដើម្បីអ្វី? ធ្វើអ្វី? ដើម្បីអ្វី? ធ្វើអ្វី? ដើម្បីអ្វី?….!
ធ្វើអ្វី តែមិនដឹងដើម្បីអ្វី = គ្មានគោលដៅ។
ធ្វើអ្វី ហើយដឹងថាដើម្បីអ្វី = មានគោលដៅ។
ពីខ្ញុំ សុីនិន
"ចិត្តបរិសុទ្ធ" គឺមានន័យថា “ធ្វើអ្វី គឺដឹងខ្លួនឯងហើយ”។
ទោះគ្មាននរណាដឹង ប៉ុន្តែខ្លួនឯងដឹង មេឃដឹង ដីដឹង ទេវតាដឹង សូម្បីតែខ្មោចព្រាយបីសាចក៏ដឹងដែរ។ ដូច្នេះហើយទើបមនុស្សទេពខុងមីងបាននិយាយថា “នៅលើលោកនេះ គ្មានទេអាថ៌កំបាំង។ បើមិនចង់ឲ្យគេដឹង លុះត្រាតែខ្លួនកុំធ្វើ”។
រីឯព្រះសម្មាសម្ពុទ្ធក៏មានពុទ្ធដីកាដែរថា “នៅក្នុងចក្រវាលនេះ អត់មានអំណាចណាធំជាងអំណាចនៃកម្មឡើយ។ កម្មមកបែបណា ផលនឹងទៅជាបែបនោះ ហើយនៅពេលដែលពេលវេលាមកដល់ ផលនេះនឹងហុចឲ្យដោយជៀសពុំរួចឡើយ”។
ពីខ្ញុំ សុីនិន
ដើម្បីអ្វី?
ឲ្យតែអ្នកអាចឆ្លើយទៅនឹងសំណួរមួយនេះបាន អ្នកក៏នឹងលែងភ័យព្រួយជាមួយនឹងការអស់កម្លាំងនៅក្នុងការធ្វើវាតទៅទៀតហើយ។ តើមែនទេ?
ពីខ្ញុំ សុីនិន
